يعني إيه مال ساخن أو Hot Money؟

يعني إيه مال ساخن أو Hot Money ؟

يعني إيه مال ساخن أو Hot Money ؟

 

بقلم مرزوقيّات “فنّ الحياة”

يعني إيه مال ساخن يعني أنا مواطن أمريكي
معايا مليون دولار
حاططهم في بنك في أمريكا
الربا عليهم صفر تقريبا ( 0.25 % )

وأنا قلت قبل كده
إنّ أيّ حدّ بيفهم بربع جنيه اقتصاد
هيلغي الربا
بغضّ النظر عن كونه مسلم ولّا ملحد حتّى
وعملت فيديو اسمه ( أضرار الفايدة )

إسرائيل – اليهود اللي اخترعوا الربا
الربا فيها 0.1 %
يعني كلّ ألف شيكل تحطّه في البنك
يعطوك عليهم شيكل واحد

 

اليابان الربا فيها – 0.06 %

اليابان الربا فيها – 0.06 %
ودي ( – ) سالب – مش شرطة
يعني تحطّ 10 آلاف ينّ في البنك
تاخدهم آخر السنة ناقصين 6 ينّ

ليه ؟
سوء استماع وسخرية
مش عاجبك ؟
خد فلوسك شغّلها في السوق

ودي النظريّة الإسلاميّة

في الإسلام لو عندك مليون جنيه
آخر السنة ناخد منهم 25 ألف
مش نعطيك – لأ – ناخد منّك

مش عاجبك
شغّل المليون جنيه واكسب منهم
وشغّل معاك الناس

نرجع للمواطن الأمريكيّ
اللي معاه مليون دولار
سايبهم في البنك
ما بيكسبوش حاجة

قوم يعمل إيه
يجيب شنطة سامسونايت
ويعبّي فيها المليون دولار
وينزل على مصر

يفكّ المليون دولار ب 15.73 مليون جنيه
يحطّهم في البنك في مصر
آخر السنة ياخد عليهم 1.3 مليون جنيه
يحوّلهم لدولارات
يعملوا 82.5 ألف دولار
بدل ما كان هيحطّهم في أمريكا
وياخد عليهم 2500 دولار فقط
يعني فرق 80 ألف دولار من الهوا

بكلمات أخرى
الراجل ده خد من مصر 1.3 مليون جنيه
من الهوا
وهوّا قاعد في بيتهم ما عملش حاجة

ما عملش حاجة إزّاي
إنتا مش لسّه قايل
إنّه جاب شنطة سامسونايت
ونزل المطار وبتاع

لا – ولا سامسونايت ولا مطار ولا حاجة
هوّا قاعد في بيتهم
والمليون دولار في مكانهم

ده تحويل حصل من البنك هناك
للبنك هنا في أوّل السنة
وتحويل حصل من البنك هنا للبنك هناك
آخر السنة

وأخينا قاعد باللكلوك ع الأريكة
يحتسي الكابتشينو في الماجّ بتاعه
ويشاهد قنوات التليفزيون المملّة

طيّب ومصر استفادت إيه ؟
استفادت إنّها خلال السنة
تقدر تقول إنّ المليون دولار دول
موجودين في البنك هنا

فيبقى عندنا احتياطيّ نقديّ كبير
من الدولار ما شاء الله
أقدر على حسّه
أستلف من الدول الأخرى
بضمان الاحتياطيّ النقديّ اللي عندي

مش بسّ كده
بوشكاش محفوظ بيضحّي النهارده

أنا كمصر أقدر أقول آخر السنة
إنّ فيه شبروميت مليون دولار
دخلوا مصر كاستثمارات أجنبيّة السنة دي

وهمّا مش استثمارات أجنبيّة
ولا حاجة إن شاء الله

همّا فلوس دخلت رقدت في البنك أوّل السنة
باضت وكلت بيضها ف آخر السنة وخلاص

بسّ بيبانوا ع السيستم دولارات داخلة
فبنقول عليها استثمارات
هوّا يعني حدّ هيراجع ورانا يعني
ما البلد بلدنا والدفاتر دفاترنا

فأنا كمصر
باخسر كلّ سنة 1.3 مليون جنيه
مقابل وجود كلّ مليون دولار
في الاحتياطيّ بتاعيّ
من أرصدة المال الساخن
ونشكركم لحسن تعاونكم معنا

طيّب وافرض دولة تانية
قالت إنّ الربا في بنوكها
9.25
بدل ال 8.25 بتوع مصر

يسحب المليون دولار

هييجي الخواجة الأمريكانيّ
بالشنطة السامسونايت بتاعته
وينزل مطار القاهرة
يروح ع البنك
يسحب المليون دولار
ويحطّهم في بنك الدولة التانية

فرهدة ؟ صحّ ؟
ولا فرهدة ولا حاجة
وولا هوّا هييجي
ولا فيه مطار في الموضوع
وما فيش شنط ساموايت ولا حاجة

ده برنامج ع الموبايل بتاعه
هيسحب المليون دولار من البنك من مصر
ويودعهم في البنك في الدولة التانية

والدولة التانية تخسر آخر السنة
من عملتها بردو
ورئيسها يتفشخر على شعبه
إنّه مش ملاحق ع الملايين
اللي جاياله من الدول المتقدّمة

الناس واقفين طوابير بالشنط السامسونايت
يخرب بيت الشهرة
الشهرة عاوزة منّي إيه بسّ

ذنبي إيه إنّي اتولدّت رئيس دولة مدقدق
أعرف أجيب الدولار من بذر العنب
العمقنة هتموّتني يا عمّ الشيخ عتمان

ويتصوّر بقى وهشتكنا وبشتكنا يا ريّس
وهوّا بيغرق هوّا والدولة بتاعته
مقابل إنّ دولته تقدر تقول
إنّ عندها احتياطيّ كبير من الدولارات
في بنكها المركزيّ
فتستلف أكتر وأكتر
بربا أكبر وأكبر
ودوّخيني يا لامونة

طيّب ما ده شرّ مطلق !!!
أيوه طبعا – شرّ مطلق
أمّال ربّنا توعّد المرابين بالحرب ليه ؟!

بسّ تقول إيه للدول
اللي يهمّها أهمّ حاجة
الاحتياطيّ اللي تقدر تستلف على حسّه

ومين يقول للخواجة الأمريكانيّ
إنّه عيب كده يا نوتي
ما تخربش اقتصادات الدول الصغيّرة يا عفريت

يعني هوّا يلاقيك سايب ثروة بلدك سداح مداح
ويبقى هوّا اللي واجبه يعفّ عنها
عشان هوّا مؤدّب
إنتا هتستعبط ؟!

ولّا إنتا اللي واجبك تمنعه من نهب بلدك ؟!!!

هيّا الدنيا هتمشي بضهرها ؟!!!
ولّا الديب هنطالبه يحرس الغنم
عشان الراعي مش فاضي

عشان كده لمّا دولة تقول أنا هخفّض الربا 1 %
الخواجات يجروا يسحبوا دولاراتهم منها
ويودعوها في بنوك دول تانية بتعطي ربا أكبر

طبعا همّا مش هيجروا ولا حاجة
وولا حتّى هيعرفوا
إنّ دولاراتهم طلعت من البلد دي
راحت البلد دي

دي برامج كومبيوتر
شغّالة توماتيكيّ توماتيكيّ
بتلاقي فلوسك في دولة الربا فيها 10 %
وفيه دولة تانية الربا فيها طلع ل 10.1 %
بتنقل فلوسك أوتوماتيك للدولة التانية

لو الدولة التانية نزلت ل 9.9 %
البرنامج هيرجّع فلوسك للدولة الأولى
توماتيكيّ توماتيكيّ بردو

إلّا لو شاف دولة تالتة
رفعت الربا ل 10.1 %
فهيروح لها توماتيكيّ بردو

فأيّ دولة هتنزّل الربا فيها 0.01 %
هيهرب منها المال الساخن فورا
فيقلّ الدولار فيها

تركيا بقى بالذات حالة خاصّة
لأنّ دي جنّة المضاربين بالمال الساخن

تركيا الفايدة فيها من أعلى ما يكون
12.5 %
وده إشي خيال يا ناس
فتعتبر حلم كلّ مضارب بالمال الساخن

عشان كده تخفيض الفايدة فيها هيّا بالذات
يخلّي كلّ كلاب العالم تهوهو عليها

هتقول لي ما عندك دول تانية
سعر الفايدة فيها أعلى من تركيا
زيمبابوي مثلا سعر الفايدة فيها 26 %

ليه مضاربين المال الساخن
ما يسحبوش فلوسهم من تركيا
ويحطّوها في زيمبابويّ

أقول لك
إيش ياخد الريح من البلاط ؟!
دا أنا ممكن أحطّ مليون دولار
في بنك في زيمبابويّ أوّل السنة
آخر السنة ما ألاقيش زيمبابوي شخصيّا

لكن تركيا – أو مصر
دول لسّه فيها خير كتير يتسرق
والحكومات في الدول دي
تقدر توفّر لي الربا بتاعي آخر السنة

يشتغلوا بقى يصنّعوا يصدّروا
يستلفوا يسرقوا يسلخوا شعوبهم
يفرضوا ضرايب رسوم محاشي مخاصي
المهمّ يوفّروا لي الربا بتاعي آخر السنة

تيجي نروح نسرق لبنان ؟
دا بيقول لك الفايدة فيها أعلى من مصر

لبنان إيه يا راجل
ما خلاص سرقوها وخلصنا
بقول لك إيش ياخد الريح م البلاط

لكن تركيا ومصر
دي دول لسّه فيها الخير

أي نعم سعر الفايدة فيها
مش أعلى سعر في القايمة
لكنّه سعر بيحقّق المعادلة
بين السعر العالي
وأمان استرداد الفلوس آخر السنة

عشان كده تركيا عاملة قلبان للعالم كلّه
مش علشان همّا خايفين
على مصلحة تركيا لا سمح الله

ولكن علشان خايفين
على النهيبة اللي كانوا بينهبوها منها كلّ سنة
لإنّها هتقلّ

فبيسحبوا فلوسهم منها
منها يودعوها في دول تانية بفايدة أعلى
ومنها يضغطوا على الاقتصاد التركيّ
عشان يرجع يرفع سعر الفايدة تاني

بيضغطوا إزّاي ؟!
مجرّد سحب الدولارات ده ضغط
سحب الدولارات بيخلّيها تقلّ
وأيّ حاجة بتقلّ بيحصل لها إيه يا أسدكائي ؟
بتغلى
بالظبط كده

فالدولار يغلى
أو بكلمات أخرى العملة المحلّيّة تنزل
فكلّ حاجة تغلى
فالشعب يصرخ في الحكومة
عشان ترفع الفايدة تاني

مع إنّ الشعب كده بيبصّ تحت رجليه
طبعا مشكلة إنّ قيمة العملة تنزل
بسّ هيّا نزلت ليه ؟!
نزلت نتيجة لتخلّص الاقتصاد
من البراغيت اللي بتمصّ دمّه

أي نعم فيه خسارة
لكن الخسارة هنا
هي مثل خسارة الدهون من الجسم
مثل خروج الدمّ الفاسد من الجسم
فنعمت الخسارة

يتبقّى لك جماعة من شعبك إنتا
ناس عويلة
مش عاوزة تشتغل
لكن معاهم فلوس

كلّ واحد معاه مليون جنيه مثلا
كان حاططهم في البنك
على أساس مستوى ربا 10 % مثلا

فالناس دي منتظرين آخر السنة
ياخدوا كلّ واحد 100 ألف جنيه من الهوا
شويّة علوق

تيجي إنتا تقول لهم
لا والله أنا نزّلت الربا ل 9 %
يعني إيه ؟
يعني ال 100 ألف اللي كنتوا هتاخدوهم
بقوا 90 ألف مش 100

وهنا طبعا نور الوطنيّة اللي ف وشّهم هيتطفى
وهيقلعوا لك ملط قدّام البنك
وهيردحوا لك ويتشرمطوا عليك أحلى شرمطة

ولو قدروا يشيلوك خالص
ويجيبوا حدّ تاني يطلّع الربا ل 11 % هيجيبوه

مع إنّ ده هيلمّ علي البلد براغيت العالم تاني
بتوع المال الساخن
مش مهمّ
المهمّ ال 10 آلاف جنيه اللي خسرتهم
يرجعوا
ويا ريت لو يرجعوا 20

شويّة صراصير طالعين من البلّاعات
ليهم اللي يدوس عليهم بالجزمة
غير كده ما ينفعش معاهم

أخيرا
فاكرين الراجل اللي كان معاه مليون دولار
وقلنا إنّه مش لازم يروح المطار
ومش لازم يكون عنده شنطة سامسونايت

إيه رأيك لو عرفت إنّه
مش لازم يكون معاه المليون دولار أصلا ؟!
يستلفهم من البنك في أمريكا عادي
هههههههههههههههههههههه
مش فيه دول هتدفع ؟

بقلم مرزوقيّات “فنّ الحياة”

اترك تعليقاً

لن يتم نشر عنوان بريدك الإلكتروني.